《新年限定》
話說今日有朋友提醒我 姐死姐還在 係喺舊年農曆新年前後開始寫，咁就冇左一年青春啦，而《講呢d 之 亞洲亞洲》亦係第一篇有網媒轉載嘅文，為左記念一周年，不如講下有關我嘅野。(都歡迎你地追問嘅，如果你又得閒冇野做)
----------------------------------------------------------------------------------------------
你到底做咩架正職？
--> 我喺「大公司」做，um，其實我成日寫，你地都搵到線索啦...
你好似做過好多份工？
--> 我本來應該去「誤人子弟」嘅，後來去左做記者，但間報社又太仆街，我就轉左去第一間「大公司」，其後再轉去另一間「大公司」...
講呀姐壞話，呀姐到底知唔知？
--> 我呀姐唔知咩係 Facebook 架，佢問我點卸除手指架...
個page 到底有幾多人寫？(有人問)我係男定女？
--> 其實得我一個人架渣，M 到嘅日子，我會記得返我係女人來的...
你D 朋友知唔知你寫呢D 野？
--> 知架，所以知個D 唔好揭穿我，因為比人知我膠嘅我會冇哂前途...其實只有幾十個朋友仔like 我呢個page，冇like 嘅朋友仔不如當恭賀新禧，趁新年like 我呀...
有冇人搵我寫野宣傳產品？
--> 有speed dating 公司搵我寫文，但我唔識寫，溝仔溝女，都不外乎溝同受溝兩個動作，好難寫到幾百字架...
你係唔係真係咁鐘意睇亞洲亞洲？
--> 我其實好鐘意睇電視(唔止亞洲亞洲)，京華春夢呀，季節呀，再見亦是老婆呀，個D 石器時代個D 電視我都有睇架...
----------------------------------------------------------------------------------------------
最後我想話，哂左你地一年嘅時間黎睇我D 文，好想多謝你地D likes，因為我有時打完都覺得，嘩，成篇論文咁長，而你地又肯睇完再比個like 我，你地真係好有耐性。
新年快樂，祝大家來年不勞而獲。
《講呢d 之 亞洲亞洲》
我其實真係好鐘意睇電視架，無得睇電視真係世界末日，我會猝死架。馬年一開始，忍唔住想講下亞洲亞洲。
其實歷年來，亞洲亞洲都好出色架。佢嘅好睇之處在於佢真係荒謬到，你永遠都估佢唔到，有時真係會忍唔住講張家輝個句：「XXXX，亞視黎嘅！」
---------------------------------------------------------------
亞洲亞洲有幾荒謬？
-->atv 可以叫陳啟泰做哂所有綜藝節目的主持，may 姐黃麗梅又可以做哂所有美食節目的主持，呢D 咪好似學校D 專科專教咁囉。
-->atv可以舉辦一個無年齡限制的選美會，而最荒謬的係，又估佢唔到真係會有個宮雪花咁嘅人參加。近年仲請花姐教2013年亞姐選美心得。
-->atv可以因為還珠格格收視好，有廿幾點，佢可以一日播4次，但我又真係比佢吸引到我一日睇哂4次。
-->atv可以用六合彩節目「局」收視，將六合彩化身黃金時段節目，再邀請夏春秋出山返黎做主持。
-->atv 可以連播兩集你睇一集都頂唔順嘅恩雨之聲，再播個馬上全接觸，教完你信教，下秒又引誘你賭博。
---------------------------------------------------------------------
當全個世界的人都覺得亞洲亞洲求其播D 野出來hea 到2015，佢今晚又再次不負眾望的發揮佢「離哂譜」的精神出來，今日大年初二，香港燒煙花，TBB 當然係直播煙花盛況啦。
我轉一轉台，睇下亞洲亞洲有咩新年驚喜，你真係估佢唔到架，亞洲亞洲竟然播返24年前，1990 年的煙花盛況，我真係從來都無諗過煙花都可以睇重播架。最估佢唔到係，佢又真係唔係離譜得哂，佢又真係搵返1990馬年的煙花比你睇，等你都不至於話：「都唔應景嘅！」。仲要為左將個節目拉長，佢竟然播放埋準備煙花的片段，包括將D 煙花放係隻船嘅排列，同埋訪問埋準備放煙花個員工，你真係估佢唔到。
先幾日，有個網民稱讚澳牛的員工有「當D 客係死嘅」個份霸氣，我諗澳牛的霸氣係點都唔及亞洲亞洲架。澳牛你都要入去食，你先feel 到個份「當你死嘅」服務態度，亞洲亞洲係只要你唔覺意hi 到個電視remote，你就即時感受到「你都係路過嘅姐」的趕客mode。
轉一轉台，亞洲亞洲真係帶比你無限的驚喜，你永遠估唔到佢有幾離譜架，我真係好想知今晚除左我轉左去睇1990年煙花重溫，仲有邊個有睇？
其實亞洲亞洲都曾經有佢輝煌的時候架，大地恩情，肥貓正傳，我和疆屍有個約會，我和春天有個約會，再見豔陽天，飄零燕，撞到正，我來自潮州，萬家燈火呀等等。
其實我真係比左好多次機會你架啦亞洲亞洲，我真係會睇架如果你做得好，但你真係迫到我地走投無路架渣，點解你會咁架？
新年流流，TBB 同ATV 都不停播埋D 無謂野，我係咁係屋企睇電視，梁振英個廣告就係咁閃出來叫我幫D 弱細社群，我之前寫信去比局長請求佢加多個電視台，佢又唔show 我地D 小市民，有時，係又反你唔係又反你，都係你迫我架渣。
Search